Naas die kenmerkende lewensvreugde wat ook uit hierdie versameling straal, leer die leser ook ‘n donkerder sy van Audrey ken - om met nuwe waardering die onuitblusbare lewensvlam raak te sien wat haar vaandel was.

Audrey Blignault was vir ’n paar generasies lesers die mees geliefde skrywer in Afrikaans. Dit is sy nog steeds. Uit die dagboek van ‘n vrou sal vir haar bewonderaars toegang bied tot haar gewilde essays wat lank reeds uit druk is. Dit sal ook nuwe lesers lok, want Audrey se aanslag is onweerstaanbaar: haar uitbeelding van ‘n bepaalde tyd en plek is onverbeterlik, telkens fyn waargeneem en sintuiglik ryk; haar deernis en begrip vir mense; die afwisseling van erns en humor, lewenswysheid, selfspot, refleksie, vreugde en verdriet. In haar geselskap beleef die leser nooit ‘n enkele oomblik van verveling nie. Hierdie versameling is uitgesoek deur Audrey se dogter, Marié Heese. Die soektog na essays wat Audrey se lewensverhaal in haar eie woorde vertel, het ‘n merkwaardige resultaat opgelewer. Verspreid oor die nege bundels uit haar Sarie-rubrieke, gepubliseer oor ‘n paar dekades, het Audrey haar lewe in sy volheid weergegee. Tesame met van haar verhale in Dit reën rose kan die leser met vreugde meeleef: haar kinderjare in Bredasdorp; studentejare, eerste huwelik, moederskap; die skok en stadige herstel ná die gruwelike ongeluk waarin lewensmaat sterf; tyd van eensaamheid; tweede huwelik; soms ontstemmende oomblikke van ouma-wees; bewustheid van die klem van die tyd wat niemand kan ontkom nie.